Selasa, 11 Juni 2013

Hatorangan Jamita

JAMITA 4 DUNG TRINITATIS, 23 JUNI 2013 Mateus 10: 16-22 Ojahan: Tondi ni Jahowa Mangalehon Hagogoon Laho Manindangi I. Barita Masa (Latarbelakang Sejarah) Asing ni angka uluan Ugamo Jahudi, Kaisar (Pemerintah) pe dohot do manghasogohon Jesus. Majelis Ugamo Jahudi do nian na umpasang marsogo ni roha tu Jesus, alai dipengaruhi nasida ma halak Sanhedrin, nang pamarenta Rom asa dohot mangambat ulaon ni Jesus. Pangalaho on paltak do tarida di pudian ni ari, uju pinasahat ni Majelis Ugamo Jahudi Jesus tu panguhum Latus dohot tu pamarenta na asingnari (jajaran kepemerintahan Romawi). Udut ni i angka siseanNa pe di pudian ni ari diorai sanhedrin (Mahkama Agama) do marjamita/mangajari di bagasan goar ni Jesus Kristus (Ulaon Ap. 4:16-18; 15:27-28). Halak on (Malim, Sanhedrin, Pemerintah) do na ginombarhon ni Jesus babiat, ala pangalahona suman tu babiat (srigala) panoro. Domu tu si, marnida hagaleon ni angka sisean, tarlumobi ma ala sian angka masyarakat kelas bawah do nasida ditodo, dipatudos Jesus do nasida suman tu birubiru na dao gumale sian babiat. Andorang so dipaborhat Jesus siseanNa i manabi/marbarita na uli, jolo dipatihi do nasida asa unang sala langka, unang tarmalitondi (kembut, kecut hati), unang sumurut di lapangan. Dohot maksud, molo nunga diboto tudia dalan sitondongonna, jala diantusi situasi kondisi siadopanna di lapangan, tontu nunga botoona manjagahon dirina. Deba sian angka patik manang poda na pinasahat ni Jesus i ma turpuk jamitanta ombas on. II. Hatorangan Dung dilehon Jesus tu siseanNa na 12 i sahala dompak (kuasa mengusir), mangalo tondi na hodar dohot pamalum nasa sahit dohot tihas (ayt.1), dipatihi ma muse nasida asa unang ditondong dalan na tuhalak sipelebegu dohot unang manopot huta ni halak Samaria, alai holan tu birubiru na mago sian pinompar ni Israel sambing ma (Ayt.5-6). Diajari do muse nasida etika mamongoti bagas ni halak Israel (Ayt.12-14). Suman tu birubiru na mangadop babiat do nasida didok Jesus, alani i asa ingkon pantas ma marroha (cerdik) songon ulok jala lindang (tulus) songon darapati (Ayt.16). Ingkon songon i do asa boi dapotsa birubiru na mago i, ala memang angka na mago i nunga di tongatonga ni babiat. Dia do lapatan ni hata pantas/marbisuk (cerdik) jala lindang (tulus) marroha na nidok ni Jesus di son? Tamba ni pangulahon sian Padan Na robi, denggan do tangihononta nang pandok ni angka pande bisuk na patorangkon sifat manang hadirion ni ulok dohot darapati. Adong manang pigapiga habisuhon ni ulok sian binatang na asing umbahen didok ibana binatang na marbisuk (cerdik), ima; Parjolo, mangilulu (ganti sisik) laho mangambolongkon kuman/parasit na lohot di sisikna asa unang gabe parohon sahit. Marhite i do molo tapamanat di paramedis gambar ni ulok do dibahen simbol ni kesehatan. Paduahon, boi marnida mangsa marhite alat infra merah na adong di simalolongna. Patoluhon, dapot diboto na adong musuna marhite indra penciumanna. Palimahon, tolap dikelabui musuna. Taingot do ra hata na mandok, “matemate ulok”. Molo darapati, setia situtu do i tu pasanganna (ada ketulusan cinta), ndang adong poguna. Jadi ndang adong na paet di dagingna. Nangpe dao ibana habang diboto do mulak muse tu bonana (tidak pernah lupa diri). Dung i rupana lindang, gabe ditudoshon do i tu kesucian dohot simbol ni Tondi Porbadia. Kelihaian, kelebihan, strategi dohot kemampuan sisongon on mansai denggan do i antong adong jala pangkeon maradophon musu. Tamba ni i taida ma jolo angka na tarsurat di Padan Na Robi, jala laos tapadomu ma i tu hatorangan ni pande bisuk na di ginjang i. Mangihuthon 1 Musa 3: 1 didok, “Ulok do binatang na umbisuk sian nasa na manggulmit di ladang na jinadihon ni Debata Jahowa”. Jala godang do antong guna dohot hinadenggan ni roha hapantason di hita jolma. Isarana, si Josef ala hapantason ni rohana do gabe lomo roha ni raja Parau marnidasa (1 Musa 41: 33+39). Saurdot tu si do tong pandok ni Raja salomo; lomo do roha ni raja marnida halak na pantas marroha (Poda 14: 35). Dung i hapantason i marguna do i mangaramoti diri, tamba ni i ringkot do muse habisuhon laho manjaga diri (Poda 2:11). Halak na pantas marroha, botoon ni ido laho manirang dia na denggan sian na roa (1 Raja 3:9), asa unang madabu tu parmaraan. Alo (lawa kata) ni hapantason neang ni roha ma. Hamagoan do upa ni halak na marneang ni roha, ianggo halak na pantas i dapotan hangoluan do (Poda 9:6). Ido na hinalomohon ni Debata Jahowa sian jolma (2 Musa 35:10). Borhat sian pangantusion na di ginjang i, tung marlaba situtu do sisean i molo pantas (cerdik) jala lindang (tulus) marroha mangadopi halak na dipasuman Jesus tu babiat i. Jala ingkon jaga nasida, unang neang rohana. Marhite pangalaho na songon i malua ma nasida sian mara kekoyolan. Alai nang pe songon i, nunga dilumbahon Jesus hian paboa toguonna do nasida tu panggomgomi dohot tu jolo ni angka raja, pasahatonna ma tu paruhuman laos linsinganna di parguruan (Ayt.17-18). Didok muse, ndang pola ringkot mabiar nasida di si, ala donganan/ajaran/turasan ni Tondi Parbadia do nasida laho mandok hatana sidohononna di na sangombas i (Ayt.19-20). Secara Geografis, tu 4 luat/huta do situjuon ni sisean i disuru Jesus, ima; Galilea, ditopi ni aek Jordan, Judea dohot Jerusalem. Di na 4 luat on, dongan samargana do pangisini i, ima sian pinompar ni Israel. Jadi tardok angka tutur na marhaha maranggi, marnatoras dope sisean i tu nasida. Alai nangpe songon i babiat do tong i, ndang sonang/nok matana marnida i. Taingot dope ra, halak on do marsuraksurakhon Hosianna ma di anak ni Raja Daud”, alai laos halak on muse do na mamparsilangkon Jesus (Mat.21:9). Ido umbahen didok Jesus; pasahaton ni hahana do anggina tu hamatean, hehe do na markeluarga manjehehon (Ayt.21-22). III. Hahonaan ni Turpuk (Menyeberangkan nats ke masa kini) Molo hurang haporseaon, pasti kembut do iba mangalangkahon silangkahonon tu inganan naung binoto mansai seram. Alai na denggan do botoon situasi kondisi ni sadasada huta situjuon andorang so borhat iba tu si, asa binoto mamparsiaphon mental. Hape ianggo hita on, torop do naso berusaha mamastihon, mangalului informasi di sadasada inganan sihobasanna. Ujungna hurang ampit ma panghobasion i. Godang do kegagalan ni parhalado huria di na manghobasi ulaon tohonanna, ala so singkop informasi di ibana. Tardok na gagal do hita nuaeng on boasa lam sumurut ama parminggu?, boasa lam torop angka na poso jajan markebaktian tu duru ni HKI?, boasa sai torop angka ruas na menunggak kewajibanna tu huria pola sampe mar 5 taon lobi?, boasa sai adong sintua na mura mardandi?, boasa hurang cinta (fanatik) ruas i tu HKI, gabe muramura pinda? Boasa sampe adong naposo ni HKI na terlibat tu narkoba dohot penyakit sosial na asing?, dohot godangnai dope ra sungkunsungkun na boi patuduhon kegagalan di huria ala hurang informasi gabe ndang umbuk program di huria. Tangkas do diparsiaphon Jesus bohal informasi dohot mental ni siseanNa andorang so dipaborhat siseanNa i manindangi. Hape molo di tingki na parpudi on nunga torop parhalado na hona karbit (naso tangkas diparbohali). Adong do istilah sintua na hona karbit, guru huria na hona karbit, pandita na hona karbit. Nunga songon i parturena, losok muse marsiajar, losok ro marsermon, gariada gabe ginjang rohana laos neang sude ulaon i di rohana. Molo tabandingkon do di masanta on tu masa ni angka apostel i na jolo, nunga dao tumenang panghilalaanta di na laho marbarita nauli i. Di bangsonta on, adong do UUD 1945 Pasal 28-29 dohot pancasila na manjamin kebebasan umat beragama. Nangpe sipata sai masa angka hagaoron marhite na manutup paksa, mangalat, mambom gareja, alai ndang haru songon na niadopan ni sisean i pasangna tahilala. Na deba masa do i ala halembaonta mangurus angka surat penting ni huria, nangpe nadeba diupayahon do alai dipersulit pihak tertentu. Laho mangadopi on, ingkon marbisuk do hita jala tulus naeng paturehonsa. Parpesalmen madok; Sai marhaposan tu Jahowa ma ho jala ulahon na denggan; inganhon ma tano i jala radoti haburjuon. Jala halomohon Jahowa, jadi lehononNa ma tu ho pinangido ni roham (Psalm. 37:3-4). Di ulaon parbaritanaulion i, jotjot do ro hamaolon (tantangan dan hambatan) sian dirinta manang keluarganta sandiri. Na deba adong do motivasi pribadina laho melayani i ndang saurdot tu tugas tohonan na jinalona, ujungna gabe parohon hamaolon tu dirina. Adong muse do na so tolap mangorom hagiot ni dagingna, ujungna gabe sisurahon ibana. Na debanari adong do ala keluarga (istri/suami/anak) na hurang mandukung, ujungna gabe partuktuhan i di panghobasionna di huria i. Saurdot tusi do na hinatahon ni Jesus di jamita on, asa dohot do nang keluarga i ingkon jamothononhon. Na marhadomuan tu son tangkas do dipatorang apostel Paulus di suratna tu si Timoteus (1 Tim 3:1-13). Saurdot tusi didok do muse; Naeng ma so hasurahan jala so marlaok hamu, angka anak ni Debata, angka na so marlindang di tongatonga ni sundut na geduk jala na marbalik; di si ma hamu marsinondang songon sisondangi portibi on! (Pilipi 2:15), Amen! IV. Ende: 1. 18 : 2-4 5. 240 : 1…. Pelean I & II 2. 162 : 6-7 6. 249 : 4-5 3. 309 : 3-4 7. 262 : 1….. Pelean III 4. 184 : 3-6 S. Patik: Roma 16:17b “Jagahon hamu ma…. D.u…” Tema: TONDI NI JAHOWA MANGALEHON HAGOGOON LAHO MANINDANGI Sub Tema: Ringgas ma ho mambohali dirim! Pantas ma ho jala lindang marroha! Jagahon ma dirim, keluargam, asa unang hasurahan ho manindangi!